عواقب خلع الأسنان

عواقب خلع الأسنان. أهم حاجه تعملها بعد ما تخلع ضرسك.

محتوى المقال

لو عندك ضرس مخلوع ولسه مكانه فاضي.. فأنا دلوقتي هقلك ايه المشاكل اللي ممكن تحصلك بسبب الخلع ده. وانا عارف انه ٩٩ في المية من الناس متعرفش المشاكل دي والا مكنوش استسهلوا في قرار خلع اسنانهم. 

ممكن تشوف الفيديو ده فيه نفس محتوي المقال.

في البداية بس يا جماعه لازم نبقى فاهمين انه قرار الخلع نفسه مينفعش يتاخد بسهولة. بمعنى انه فيه للأسف شخص دايما اول ما ضرسه يوجعه بيبقى عاوز يخلع على طول حتى لو كان ممكن يتعالج. وانا مثلا في حالات زي كده مش بوافق على الخلع وبحاول طبعا اقنع الشخص ده يحافظ على ضرسه ويعالج افضل كتير من الخلع. 

خلع الضرس أم علاجه؟ أيها أكثر تكلفة؟

بعض الناس بتبقى مشكلتهم في التكلفه.. بس حتى لو كده.. هما مش حاسبينها صح خالص. 

اللي فاكر انه خلع الضرس اوفر من علاجه غلطان طبعا. لانه تكلفة تعويض الضرس اللي هتخلعه هتبقى اكبر بكتير من علاجه.. وفي كل الأحوال ايا كانت طريقة التعويض فإن الضرس الطبيعي اكيد افضل. 

طرق تعويض مكان الخلع المختلفة.

وطبعا فيه كذا طريقة لتركيب او تعويض ضرس مخلوع وافضلهم مثلا الزراعه وتكلفتها اكبر طبعا من علاج الضرس من البدايه حسب بأه المشكله اللي كانت فيه. 

حصل اللي حصل بأه وخلعت ضرسك وأصبح مكانه فاضي.. ايه المشاكل اللي ممكن تحصل.. ودي حاجات حصلت بالفعل في حالات كتير وشفتها كتير جدا. 

وده مقال وبداخله فيديو عن الفرق بين طرق التعويض المختلفه. زراعة الأسنان وتركيبات الأسنان الثابتة والتركيبات المتحركة. اضغط هنا

وده فيديو عن الفرق بين تركيبات الزيركون والايماكس

مشكلات خلع الأسنان وعدم تعويضها:

حركة الأسنان المستمرة بعد الخلع.

فاللي بيحصل لو خلعت ضرس سفلي مثلا.. الضرس اللي وراه بيتحرك لقدام ويميل ميبقاش واقف عدل حتى. 

وكذلك الضرس اللي قبل مكان الخلع بيميل برده لورا.. وطبعا بيعملو فراغات بينهم وبين الضروس اللي جنبهم. 

جيوب لثوية والتهابات في اللثة

الفراغات دي بتعمل جيوب لثوية والتهابات لثه وانحسار في اللثه والعضم لاحقا.

تسوس الأسنان المجاورة والمقابلة.

كمان بسبب دخول الاكل دايما في الفراغات دي بتعمل تسوس للضرسين اللي بيتحشر بينهم الاكل. 

طيب بس كده.؟ لا تعالي نشوف ايه اللي هيحصل في أسنان الفك المقابل. 

تأثير خلع الضرس علي أسنان الفك المقابل:

الضرس المقابل لمكان الخلع بينزل في الفراغ ده مع الوقت. بيبقى مستواه بارز كتير عن باقي الضروس اللي قبله وبعده. 

وده برده يخلي مكان الاتصال بينه وبينه الضروس اللي جمبه مش مظبوطه.. برده تخلي الاكل يتحشر بينهم ويحصل فيهم تسوس. 

تأثير خلع الأسنان علي عظام الفك:

مكان الخلع نفسه بيحصل فيه انحسار في عظام الفك جدا.. فتيجي بعد فتره يصعب عمل الزراعه في المكان ده الا لو عملت جراحه الأول فيها ترجع حجم العضم ده تاني فيسمحلك بعمل الزراعه.. 

ولو كان الخلع في الفك العلوي.. فالجيوب الانفيه داخل عظام الفك بتكبر في الحجم وتاخد مكان جذور الضرس اللي اتخلع. 

ويحتاج جراحه تانيه مع او قبل الزراعه علشان ترفع الجيب الانفي تاني وتملي المكان دا ب عضم تاني علشان تعرف تزرع. وتسمى بـ رفع الجيوب الانفية قبل زراعة الأسنان.

خلاصة عواقب خلع ضرس وعدم تعويضه:

اذا لو عدى فتره طويلة بأه على مكان فاضي بسبب ضرس مخلوع هتبقى محصلة المشاكل ايه….

  • ٤ جيوب لثوية محترمه.. اعوجاج الضروس وبكده هتبقي محتاجه تقويم علشان تتعدل.  شوفو بأه تكلفة تقويم الأسنان كام…
  • انحسار وتاكل عظام الفك.
  • نزول الجيوب الانفيه مما يصعب عملية الزراعه لاحقا.
  • تسوس ٥ ضروس في الجنب ده كله.
  • اطباق الفكين اختلف وممكن بسببه يحصلك مشاكل في مفصل الفك. 

تكلفة التعويض السليم كل ما تتأخر كل مل هتزيد كتير. 

اذا من البدايه القرار الأفضل والاوفر في التكلفه ليك هو الحفاظ على الضرس نفسه ومتخلعوش الا في الضرورة القصوى طبعا وانه ميبقاش فيه اي امل في الضرس ده. 

السؤال هنا.. واحد هيقول طيب ما انا عالجته وحشيته وعملت وسويت وبااااظ. اعمل ايه؟ 

اختار الدكتووور صح. متختارش الدكتور علي اساس هو رخيص ولا غالي؟ اختار الدكتور اللي شغله كويس ومضمون ولا لأ. 

وان شاء الله هنبقى نعمل حلقه مخصوص عن الموضوع ده. 

More
articles