تعليمات بعد خلع الضرس
قبل الحديث عن تعليمات بعد خلع الضرس , عاوز أقول نقطة مهمة جدا. وهي انك مينفعش تخلع ضرسك الا لسبب
قوي جدا جدا. بمعني انه يكون مفيش أي أمل في الضرس ده نهائي. وهنتكلم عن الحالات دي بالتفصيل في مقال تاني ان شاء الله لاحقا.
مهم جدا تعرف الحالات دي علشان للأسف دكاترة أسنان كتير بتخلع للمرضي بدون اخبارهم بالنصائح او الطرق اللي ممكن ينقذ بيها ضرسه وميخلعوش.
سريعا كده هنذكر عنواين الحالات دي بس بدون تفاصيل:
محاذير خلع الاسنان
أولا. ضرس مكسور تماما وظاهر في الاشعة السنية انه الجزء السليم منه تحت مستوي عظام الفك
ثانيا. ضرس او سنة تحتها عدوى بكتيرية .. يعني تحتها “خراج” وحاولت تعالجه بالطرق العادية كحشو العصب او الادوية ولم يتم علاجه.
ثالثا. ضرس ممكن تخلعه لو محتاج تعمل تقويم وده بيحدده الدكتور المتخصص في التقويم.
رابعا. ضرس مدفون زي ضرس العقل وبيسبب مشكلة او متوقع انه يسبب مشكلة لاحقا.
يلا بينا نتكلم عن تعليمات بعد خلع الضرس.
تعليمات بعد خلع الضرس
أي ضرس بنخلعه بيحصل في مكان الجرح نزيف دموي. الدم ده مع الوقت بيكون تجلط دموي في مكان الخلع. ودي أهم حاجه بتدور حولها التعليمات. اننا لازم نحافظ علي التجلط الدموي لانه هو اللي هيحمي عظام الفك اللي كانت محيطة بالضرس من انها تكون متعرية وتتلوث .. ولو حصل واتلوثت بيحصل ألم شديد بعد 48 ساعة من الخلع.
يلا نعرف ازاي نحافظ علي التجلط الدموي ده.
أولا. الحفاظ علي القطنة أو قطعة الشاش اللي الدكتور وضعها ليك علي الجرح لمدة ساعتين او ثلاث ساعات علشان توقف النزيف والدم ميخرجش بره مكان الجرح.
ثانيا. ممنوع المضمضه او البصق لمدة 24 ساعة بالمياة او بغيرها. لأن المضمضه ممكن تخرج التجلط الدموي من مكان الجرح ايضا.
ثالثا. هتغسل أسنانك عادي بالفرشاه والمعجون وتستخدم خيط الاسنان عادي في كل مكان في الفم الا بالقرب من مكان الخلع .. بالعكس ضروري تغسل أسنانك كويس جدا علشان تتجنب ان بقايا الطعام تلوث الجرح.
رابعا. منع التدخين لفترة ما بعد الخلع لحين ما الجرح يلتأم كويس والا التدخين هيأثر علي مكان الجرح وممكن يلوثه.
خامسا. بعد مرور 24 ساعه هتستخدم مضمضمه ” ماء دافئ وملح ” ” نصف كوب ماء دافئ عليه نصف ملعقة صغيرة من الملح ” وتعمل المضمضمه دي ثلاث أو أربع مرات يوميا.
سادسا. عمل كمادات باردة لمدة 10 دقائق علي مكان خلع الضرس من خارج الفم علشان تقلل من فرص حدوث تورم بعد خلع السن وان كان حدوث تورم بعد الخلع شئ طبيعي في حالات كثيرة.
سابعا. تناول اطعمة لينة ” طرية ” soft food يعتبر أحد أهم تعليمات ما بعد خلع السن والأفضل انه يكون بارد ونتجنب ايضا الأكل الحار spicy food لمدة 24 ساعة وتجنب الشرب بالشفاط “الشاليمو”. وتمضغ الأكل علي الجانب الآخر من الخلع.
ثامنا. أخذ المسكن والأدوية كالمضادات الحيوية التي وصفها لك طبيب الأسنان بعد خلع الضرس.
لمشاهدة فيديو تعليمات ما بعد خلع الضرس. اضغط هنا
ملحوظة مهمة جدااا. طبعا لازم تكون عارف انه أي ضرس أو سن هتخلعه غير خلع ضرس العقل لازم تعوضها بزراعة الأسنان أو تركيبات الأسنان الثابتة أو تركيبات الأسنان المتحركة. والفيديو ده بيوضح الفرق بينهم والمشاكل التي يمكن ان تحدث اذا لم يتم تعويض الضرس بعد خلعه. شاهد الفيديو
